З 6 ліпеня пачынае працу выстаўка да 140-годдзя з дня нараджэння народнага паэта Беларусі Янкі Купалы “Паўлінка”.
Станаўленне і развіццё беларускай літаратуры і тэатра непарыўна звязана з іменем народнага паэта Беларусі Янкі Купалы. Цяжка пераацаніць той уплыў, які аказала яго творчасць на развіццё беларускага прафесійнага тэатральнага мастацтва. Створаная Я. Купалай камедыя “Паўлінка” адыграла выключную ролю ў жыцці тэатраў.
Упершыню “Паўлінка” была пастаўлена 27 студзеня 1913 г. у Вільні Беларускім музычна-драматычным гуртком. 9 лютага 1913 г. адбылася пецярбургская прэм’ера камедыі, ажыццёўленая Беларускім навукова-літаратурны гуртком. У падрыхтоўцы спектакля актыўны ўдзел браў сам Я. Купала. Галоўную ролю выконвала Паўліна Мядзёлка.
Першы на Беларусі паказ “Паўлінкі” прайшоў 15 жніўня 1913 г. У гэты дзень ў Радашковічах спектакль быў сыграны трупай пад кіраўніцтвам Ф. Ждановіча. “Паўлінка” была паказана ў Бабруйску, Магілёве, Оршы і Слуцку.
У рэпертуары БДТ-1 “Паўлінка”, у пастаноўцы Ф.Ждановіча, з’явілася ў верасні 1920 г., неўзабаве пасля афіцыйнага адкрыцця тэатра (пазней спектакль дапрацоўваў Е. Міровіч). У 1921 г. у Мінску “Паўлінку” паставіла Трупа беларускіх артыстаў, якой кіраваў Ул.Галубок.
У 1944 г. БДТ-1 паставіў “Паўлінку” у г.Томску (рэжысёр Л. Літвінаў, мастак Б. Малкін). У спектаклі былі заняты лепшыя сілы тэатральнага калектыву – Б. Платонаў, Г. Глебаў, Л. Ржэцкая, У. Дзядзюшка, В. Пола, І. Шаціла, Р. Кашэльнікава. Цудоўнае акцёрскае выкананне, яркі каларыт спектакля, маляўнічыя нацыянальныя песні і танцы – усё выклікала захапленнне гледачоў. А папоўніць галерэю неўвядальных Паўлінак у тэатры лічылася за гонар. Даўно стала традыцыяй адкрываць “Паўлінкай” новыя тэатральныя сезоны.
На выстаўцы прадстаўлены: друкаваныя творы Янкі Купалы (1-е і 2-е выданні “Паўлінкі”), рукапісы паэта, фотаздымкі П. Мядзелкі і яе асабістыя матэрыялы, афішы, эскізы касцюмаў, мемарыяльныя рэчы акцёраў.
Выстаўка стане дапаўненнем тэмы на пастаяннай экспазіцыі.
Уваход на выстаўку па квітку на пастаянную экспазіцыю музея.
Музей працуе: з 11.00 да 19.00
Без выходных
Каса працуе: 11.00 – 18.30
Уваход наведвальнікаў: 10.00 – 18.30
Для дарослых:
Агляд экспазіцыі – 6 бел.руб.
Экскурсія – 7 бел.руб.
Для студэнтаў дзённай формы навучання:
Агляд экспазіцыі – 4 бел.руб.
Экскурсія – 5 бел.руб.
Для школьнікаў і навучэнцаў ССНУ:
Агляд экспазіцыі – 3 бел.руб.
Экскурсія – 4 бел.руб.
Для пенсіянераў:
Агляд экспазіцыі – 4 бел. руб.
Экскурсія – 5 бел.руб.
Прагляд міні-прадстаўлення
«Батлеечная інтэрмедыя» -
5 бел.руб. (групы да 25 чалавек)